May mga salitang sa puso'y umaawit

Kay gandang pakinggan sa tenga'y kumakapit

May musika na tila dumuduyan sa langit

Ang iba'y may saya, lungkot at pait.

 

Itong awit na aking sambit

Laan sa pag-ibig kong masakit

Nagmahal, nasaktan, lumuha't nagalit

Iniwan sa gitna ng kalyeng mainit.

 

Puso'y sumulat ng mga letra at gumuhit

Dala ang pait sa mga salitang ginamit

Nilapatan ng ritmo upang maging awit

Nang maibahagi sa iba ang aking sinapit.

 

Tulad ng awit na aking nasambit

Dumating ang panahon at ito'y nawaglit

Muling narinig mga nakalipas na pait

Napangiti, napaisip sa ala-ala'y umulit.